Ombudsman kan Filipinas

An Ombudsman kan Filipinas, inaapod man na Tanodbayan kan Filipinas, iyo an ombudsman^[1] na responsable sa pagimbestigar siisayman na opisyal sa gobyerno nin Filipinas na pigsahotan na kaggibo nin mga krimen, orog na mga kabuktotan asin korupsyon sa mga gawe niyang konektado sa saiyang katongdan o opisyo.

Sa irarom kan 1987ng Konstitusyon kan Filipinas, asin sa ri'gon kan napalaman sa Akta Ombudsman nin 1989, an opisina kan Ombudsman nagsasadiring magmanman kan tolong sanga kan gobyerno sa pagsidsid kan anoman na mga gaweng korupsyon.

An Ombudsman iyo an tinokahan nanggad na magimbestigar sa sadiri niyang pag'onoy o huli sa reklamo nin sarong namamanwaan, sa anoman na porma o manera, anoman na akto, gawe-gawe, o pagpabaya, nin sarong opisyal o empleyado, kaiba idtong mga empleyado sa mga korporasyon na kontrolado o pagsasadiri kan gobyerno, na pighuhuna ilegal, may inhustisya, dai tama o dai toltol, o gaweng malinaw na inepisyente. Pakatapos kan imbestigasyon, kun nadadapat, an Ombudsman nasa'ngat nin kargo sa Sandiganbahyan, sarong espesyal na korte laban korupsyon.

An Opisina nin Ombudsman sakop pa mga opisinang katarakod igdi na binibilog nin Sheriff, katuwang na Ombudsman, asin anom na deputy na may kapot kan manlaenlaen na buro o dibisyon.

1. ↑ http://www.gov.ph/constitutions/1987-constitution/ Archived 2016-06-17 at the Wayback Machine. Kinua 10-5-16